Tiger Trapped | ഒടുവില് കുടുങ്ങി: ചീരാലില് ഭീതി വിതച്ച കടുവ വനംവകുപ്പിന്റെ കെണിയിലായി
വയനാട്: (www.kvartha.com) ഒരു മാസത്തിലേറെയായി ജനവാസ മേഖലയിലിറങ്ങി വളര്ത്തുമൃഗങ്ങളെ ആക്രമിച്ച് ചീരാലില് ഭീതി വിതച്ച കടുവ ഒടുവില് വനംവകുപ്പിന്റെ കെണിയിലായി. പഴൂര് ഭാഗത്ത് സ്ഥാപിച്ച കൂട്ടിലാണ് കടുവ കുടുങ്ങിയത്. പുലര്ചെയോടെയാണ് കടുവ വനംവകുപ്പ് സ്ഥാപിച്ച കൂട്ടില് കെണിയിലാകുന്നത്.
പുലര്ചെയോടെ മറ്റൊരു വളര്ത്തുപശുവിനെ കൂടി കടുവ ആക്രമിച്ചെന്നാണ് നാട്ടുകാര് പറയുന്നത്. ഇതിന് പിന്നാലെയാണ് കെണിയില് കുടുങ്ങിയത്. കടുവയെ ബത്തേരിയിലുള്ള പരിപാലന കേന്ദ്രത്തിലേക്ക് എത്തിച്ചു.
കടുവയെ പിടികൂടണമെന്ന ശക്തമായ ആവശ്യവുമായി ജനങ്ങള് പ്രതിഷേധം തുടരുന്നതിനിടെയാണ് കെണിയില് കുടുങ്ങുന്നത്. ഒരുമാസത്തിനിടെ ഒന്പത് പശുക്കളാണ് ചീരാലില് കടുവയുടെ അക്രമണത്തില് കൊല്ലപ്പെട്ടത്.
കടുവയെ പിടികൂടാന് വൈകുന്നതില് പ്രതിഷേധിച്ച് കഴിഞ്ഞ ദിവസം നാട്ടുകാര് ഗൂഡല്ലൂര് ഭാഗത്തേക്കുള്ള റോഡ് ഉപരോധിച്ചിരുന്നു. നൂല്പ്പുഴ പൊലീസ് സ്റ്റേഷന് സമീപമുള്ള പ്രദേശത്ത് ഉള്പെടെ തുടര്ച്ചയായി കടുവയിറങ്ങുന്നുണ്ടെന്ന് നാട്ടുകാര് ആരോപിച്ചു. നേരത്തെ തന്നെ ചീരാലില് കടുവയെ പിടികൂടണമെന്ന് ആവശ്യപ്പെട്ട് നാട്ടുകാര് നിരവധി പ്രതിഷേധങ്ങള് നടത്തിയിരുന്നു.
Powered by Info News For You
Comments
Post a Comment