Aryatan Muhammad | മുന് മന്ത്രിയും മുതിര്ന്ന കോണ്ഗ്രസ് നേതാവുമായ ആര്യാടന് മുഹമ്മദ് അന്തരിച്ചു
കോഴിക്കോട്: (www.kvartha.com) മുന് മന്ത്രിയും മുതിര്ന്ന കോണ്ഗ്രസ് നേതാവുമായ ആര്യാടന് മുഹമ്മദ് (87) അന്തരിച്ചു. ഞായറാഴ്ച പുലര്ചെ കോഴിക്കോട്ടെ സ്വകാര്യ ആശുപത്രിയിലായിരുന്നു അന്ത്യം. ഹൃദയസംബന്ധമായ അസുഖത്തെ തുടര്ന്ന് ചികിത്സയിലായിരുന്നു. കേരള നിയമസഭയിലെ മുന് വൈദ്യുതി, ഗതാഗത മന്ത്രിയാണ് ആര്യാടന് മുഹമ്മദ്.
കോണ്ഗ്രസ് അംഗമായി 1952-ലാണ് അദ്ദേഹം രാഷ്ട്രീയത്തില് പ്രവേശിച്ചത്. 1958 മുതല് കെപിസിസി. അംഗമാണ്. മലപ്പുറം ജില്ല കോണ്ഗ്രസ് കമിറ്റിയുടെയും വിവിധ ട്രേഡ് യൂനിയനുകളുടെയും പ്രസിഡന്റായി പ്രവര്ത്തിച്ചിട്ടുണ്ട്. മികച്ച പാര്ലമെന്റേറിയനും പ്രഭാഷകനും വായനക്കാരനുമായിരുന്നു.
മലപ്പുറം നിലമ്പൂരില് ആര്യാടന് ഉണ്ണീന്റെയും കദിയുമ്മയുടേയും ഒന്പത് മക്കളില് രണ്ടാമനായി 1935 മേയ് 15നാണ് ആര്യാടന് മുഹമ്മദിന്റെ ജനനം. നിലമ്പൂര് ഗവ. മാനവേദന് ഹൈസ്കൂളില് നിന്നാണ് വിദ്യാഭ്യാസം നേടിയത്. സ്കൂള് ഫുട്ബോള് ടീം ക്യാപ്റ്റനായിരുന്നു അദ്ദേഹം. ട്രേഡ് യൂനിയന് പ്രവര്ത്തനത്തിലൂടെ രാഷ്ട്രീയത്തില് പ്രവേശിച്ച ആര്യാടന് 1959ല് വണ്ടൂര് ഫര്ക്ക കോണ്ഗ്രസ് കമിറ്റി പ്രസിഡന്റായി തെരഞ്ഞെടുക്കപ്പെട്ടു. 1960ല് കോഴിക്കോട് ഡിസിസി സെക്രറിയായി.
1962 ല് വണ്ടൂരില് നിന്ന് കെപിസിസി അംഗം. 1969ല് മലപ്പുറം ജില്ല രൂപവത്ക്കരിച്ചപ്പോള് ഡിസിസി പ്രസിഡന്റായി. 1978മുതല് കെപിസിസി സെക്രടറിയായി. എന്നാല് കന്നി തെരഞ്ഞെടുപ്പില് വിജയിക്കാനായില്ല. 1965ലും, 67ലും നിലമ്പൂരില് നിന്ന് നിയസഭയിലേക്ക് മത്സരിച്ചെങ്കിലും കെ കുഞ്ഞാലിയോട് തോറ്റു.
പൊന്നാനിയില് നിന്ന് ലോക് സഭയിലേക്ക് മത്സരിച്ച് തോറ്റു. എ ഗ്രൂപ്പ് ഇടതുപക്ഷത്തെത്തിയപ്പോള് ആ വര്ഷം എംഎല്എയാകാതെ തന്നെ ഇടത് മുന്നണി മന്ത്രിസഭയില് മന്ത്രിയായി. വനം-തൊഴില് വകുപ്പാണ് ലഭിച്ചത്. സി ഹരിദാസ് നിലമ്പൂരില് എംഎല്എ സ്ഥാനം രാജിവെച്ച് ഉപതിരഞ്ഞെടുപ്പില് മത്സരിച്ച് മുല്ലപ്പള്ളി രാമചന്ദ്രനെ തോല്പ്പിച്ച് നിയമസഭയിലെത്തി. എന്നാല്, 1982ല് ടി കെ ഹംസയോട് തോറ്റത് തിരിച്ചടിയായി. പിന്നീട് ഏറെക്കാലം നിലമ്പൂരിനെ പ്രതിനിധീകരിച്ചു.
1987 മുതല് 2011 വരെ എല്ലാ തെരഞ്ഞെടുപ്പുകളിലും ജയിച്ചു. തൊഴില് മന്ത്രിയായിരിക്കെ തൊഴില്രഹിത വേതനവും കര്ഷക തൊഴിലാളി പെന്ഷനും നടപ്പാക്കി. നിലവില് വാര്ധക്യസഹജമായ അസുഖങ്ങളെ തുടര്ന്ന് ഏറെക്കാലമായി ചികിത്സയിലായിരുന്നു.
ഭാര്യ: പി വി മറിയുമ്മ. മക്കള്: അന്സാര് ബീഗം, ശൗക്കത്ത് (നിലമ്പൂര് സഹകരണ അര്ബന് ബാങ്ക് ചെയര്മാന്, കെപിസിസി സംസ്കാര സാഹിതി അധ്യക്ഷന്), കദീജ, ഡോ. റിയാസ് അലി (പെരിന്തല്മണ്ണ എംഇഎസ് മെഡികല് കോളജ് അസ്ഥി രോഗ വിദഗ്ദന്). മരുമക്കള്: ഡോ. ഹാശിം ജാവേദ് (ശിശുരോഗ വിദഗ്ദന്, മസ്ഖത്), മുംതാസ് ബീഗം, ഡോ. ഉമ്മര് (കോഴിക്കോട് ബേബി മെമ്മോറിയല് ഹോസ്പിറ്റല്, ന്യൂറോളജിസ്റ്റ്), സിമി ജലാല്.
ആര്യാടന് മുഹമ്മദിന്റെ നിര്യാണത്തില് മുഖ്യമന്ത്രി അനുശോചിച്ചു
തിരുവനന്തപുരം: മുതിര്ന്ന കോണ്ഗ്രസ് നേതാവും മുന് മന്ത്രിയുമായ ആര്യാടന് മുഹമ്മദിന്റെ നിര്യാണത്തില് മുഖ്യമന്ത്രി പിണറായി വിജയന് അനുശോചിച്ചു. ഇടതുപക്ഷവുമായി യോജിച്ചും വിയോജിച്ചും പ്രവര്ത്തിച്ച രാഷ്ട്രീയ പശ്ചാത്തലം അദ്ദേഹത്തിനുണ്ടായിരുന്നു.
ശ്രദ്ധേയനായ നിയമസഭാ സാമാജികനായിരുന്നു. മതനിരപേക്ഷ നിലപാടുകള് ഉയര്ത്തിപ്പിടിക്കുന്നതിന് എന്നും അദ്ദേഹം തയ്യാറായിരുന്നു. തന്റെ വാദമുഖങ്ങള് ശക്തമായി നിയമസഭയില് അവതരിപ്പിക്കുന്നതില് മികവ് പുലര്ത്തിയിരുന്ന സാമാജികനായിരുന്നു ആര്യാടന് മുഹമ്മദ് എന്ന് മുഖ്യമന്ത്രി അനുശോചന സന്ദേശത്തില് പറഞ്ഞു.
Keywords: Kozhikode, Kerala, Kerala, Congress, Obituary, hospital, Treatment, Minister, Former minister Aryatan Muhammad passed away.
Powered by Info News For You
Comments
Post a Comment