Aryadan Muhammed | മുന്മന്ത്രിയും മുതിര്ന്ന കോണ്ഗ്രസ് നേതാവുമായ ആര്യാടന് മുഹമ്മദ് അന്തരിച്ചു
കോഴിക്കോട്: (www.kvartha.com) മുന്മന്ത്രിയും മുതിര്ന്ന കോണ്ഗ്രസ് നേതാവുമായ ആര്യാടന് മുഹമ്മദ് (87) അന്തരിച്ചു. കോഴിക്കോട്ടെ ആശുപത്രിയില് ഞായറാഴ്ച രാവിലെ 7.40നാണ് അന്ത്യം. ഒരാഴ്ചയായി ചികിത്സയിലായിരുന്നു.
കേരള നിയമസഭയിലെ മുന് വൈദ്യുതി, ഗതാഗത മന്ത്രിയുമായിരുന്നു ആര്യാടന് മുഹമ്മദ്. കോണ്ഗ്രസ് അംഗമായി 1952-ലാണ് അദ്ദേഹം രാഷ്ട്രീയപ്രവേശനം നടത്തിയത്. 1958 മുതല് കെപിസിസി അംഗമാണ്. മലപ്പുറം ജില്ല കോണ്ഗ്രസ് കമിറ്റിയുടെയും വിവിധ ട്രേഡ് യൂനിയനുകളുടെയും പ്രസിഡന്റായി പ്രവര്ത്തിച്ചിട്ടുണ്ട്. വിവിധ ട്രേഡ് യൂനിയനുകളുടെ നേതൃസ്ഥാനം വഹിച്ചിട്ടുണ്ട്.
1935 മേയ് 15ന് ആര്യാടന് ഉണ്ണീന്റേയും കദിയുമ്മയുടേയും ഒന്പത് മക്കളില് രണ്ടാമനായാണ് ആര്യാടന് മുഹമ്മദിന്റെ ജനനം. നിലമ്പൂര് ഗവ.മാനവേദന് ഹൈസ്കൂളിലായിരുന്നു വിദ്യാഭ്യാസം. സ്കൂള് ഫുട്ബോള് ടീം ക്യാപ്റ്റനായിരുന്നു. ട്രേഡ് യൂനിയന് പ്രവര്ത്തനത്തിലൂടെ രാഷ്ട്രീയത്തിലെത്തി. 1959ല് വണ്ടൂര് ഫര്ക്ക കോണ്ഗ്രസ് കമിറ്റി പ്രസിഡന്റായി. 1960ല് കോഴിക്കോട് ഡിസിസി സെക്രടറിയായി തിരഞ്ഞെടുക്കപ്പെട്ടു. 1962 വണ്ടൂരില് നിന്ന് കെപിസിസി അംഗം. 1969ല് മലപ്പുറം ജില്ല രൂപവല്ക്കരിച്ചപ്പോള് ഡിസിസി പ്രസിഡന്റായി. 1978മുതല് കെപിസിസി സെക്രടറിയായി പ്രവര്ത്തിച്ചു.
1965ലും, 67ലും നിലമ്പൂരില് നിന്ന് നിയസഭയിലേക്ക് മത്സരിച്ചെങ്കിലും കെ കുഞ്ഞാലിയോട് തോറ്റു. 1969ല് ജൂലൈ 28ന് കുഞ്ഞാലി വധകേസില് പ്രതിയായി ജയില്വാസം. ഹൈകോടതി കുറ്റവിമുക്താനാക്കി. 1977ല് നിലമ്പൂരില് നിന്ന് നിയസഭയിലെത്തി. 1980ല് എ ഗ്രൂപ്പ് ഇടത് മുന്നണിയില്. പൊന്നാനിയില് നിന്ന് ലോക് സഭയിലേക്ക് മത്സരിച്ച് തോറ്റു. ആ വര്ഷം എംഎല്എ ആകാതെ ഇടത് മുന്നണി മന്ത്രിസഭയില് വനം തൊഴില് മന്ത്രിയായി.
തുടര്ന്ന് ആര്യാടന് വേണ്ടി സി ഹരിദാസ് നിലമ്പൂരില് എംഎല്എ സ്ഥാനം ഒഴിഞ്ഞു. ഉപതിരഞ്ഞെടുപ്പില് ആര്യാടന്, മുല്ലപ്പള്ളി രാമചന്ദ്രനെ തോല്പ്പിച്ചു. 1982ല് ടി കെ ഹംസയോട് തോല്ക്കുകയും ചെയ്തു. തുടര്ന്നിങ്ങോട്ട് 1987മുതല് 2011വരെ എല്ലാ തിരഞ്ഞെടുപ്പുകളിലും ആര്യാടനായിരുന്നു ജയം. 1995ല് ആന്റണി മന്ത്രിസഭയില് തൊഴില് ടൂറിസം മന്ത്രിയായി. 2005ലും, 2001ലും ഉമ്മന്ചാണ്ടി മന്ത്രിസഭയില് വൈദ്യുതി മന്ത്രിയായിരുന്നു.
1980ല് തൊഴില് മന്ത്രിയായിരിക്കെ തൊഴില്രഹിത വേതനവും, കര്ഷക തൊഴിലാളി പെന്ഷനും നടപ്പാക്കി. 2005ല് വൈദ്യുതി മന്ത്രിയായിരിക്കെ ആര്ജിജിവൈ പദ്ധതിയില് മലയോരങ്ങളില് വൈദ്യുതി എത്തിച്ചു. 2011ല് മലബാറില് പ്രത്യേകിച്ച് മലപ്പുറം ജില്ലയില് വോള്ട്ടേജ് ക്ഷാമം പരിഹരിക്കാന് പദ്ധതികള് നടപ്പാക്കി. ഉള്വനത്തില് ആദിവാസികള് കോളനികളിലും വൈദ്യുതി എത്തിക്കാനും അദ്ദേഹം മുന്കൈ എടുത്തു.
ഭാര്യ പി വി മറിയുമ്മ. മക്കള്: അന്സാര് ബീഗം, ഷൗക്കത്ത് (നിലമ്പൂര് സഹകരണ അര്ബന് ബാങ്ക് ചെയര്മാന്, കെപിസിസി സംസ്കാര സാഹിതി അധ്യക്ഷന്), ഖദീജ, ഡോ. റിയാസ് അലി(പെരിന്തല്മണ്ണ എംഇഎസ് മെഡികല് കോളജ് അസ്ഥി രോഗ വിദഗ്ദന്). മരുമക്കള്: ഡോ. ഹാശിം ജാവേദ് (ശിശുരോഗ വിദഗ്ദന്, മസ്കറ്റ്), മുംതാസ് ബീഗം, ഡോ. ഉമ്മര് (കോഴിക്കോട് ബേബി മെമോറിയല് ഹോസ്പിറ്റല്, ന്യൂറോളജിസ്റ്റ്), സിമി ജലാല്.
Powered by Info News For You
Comments
Post a Comment