Onam Kit | സംസ്ഥാന സര്കാരിന്റെ ഓണക്കിറ്റ് വരുന്ന ചൊവ്വാഴ്ച മുതല് വിതരണത്തിന്; മില്മ നെയ്യും കശുവണ്ടി പരിപ്പും ഉള്പെടെ 14 ഇനങ്ങള്; പാകിംഗ് 80 ശതമാനവും പൂര്ത്തിയായതായി സപ്ലൈകോ
കൊച്ചി: (www.kvartha.com) സംസ്ഥാന സര്കാരിന്റെ ഈ വര്ഷത്തെ ഓണകിറ്റ് വരുന്ന ചൊവ്വാഴ്ച മുതല് വിതരണത്തിന് എത്തുന്നു. ഭക്ഷ്യകിറ്റിന്റെ പാകിംഗ് എണ്പത് ശതമാനവും പൂര്ത്തിയായതായി സപ്ലൈകോ അറിയിച്ചു. തുണി സഞ്ചി ഉള്പെടെ 14 ഇനങ്ങളാണുള്ളത്.
90 ലക്ഷം ഭക്ഷ്യകിറ്റുകളാണ് സംസ്ഥാനത്തെ റേഷന് കാര്ഡ് ഉടമകള്ക്കായി തയ്യാറാകുന്നത്. പാകറ്റ് ഉത്പന്നങ്ങളാണ് എല്ലാം. സപ്ലൈകോ സ്റ്റോറുകളോട് ചേര്ന്ന് കൂടുതല് സ്ഥലങ്ങള് വാടകയ്ക്ക് എടുത്തും പാകിംഗ് തുടരുകയാണ്.
കഴിഞ്ഞ വര്ഷം പപ്പടവും, ശര്ക്കരയുമാണ് സപ്ലൈകോയ്ക്ക് തല വേദനയായത്. എന്നാല് ഇത്തവണ മുന്വര്ഷത്തെ പാളിച്ചകള് ആവര്ത്തിക്കാതിരിക്കാന് പരമാവധി കരുതലെടുത്തെന്ന് സ്പ്ലൈകോ. വളരെ കരുതലോടെയാണ് സപ്ലൈകോ ഓണം കിറ്റ് തയാറാക്കിയത്.
ഇക്കുറി കഴിഞ്ഞ വര്ഷം പരാതികള് ഏറെ കേട്ട പപ്പടത്തിനും ശര്ക്കരയ്ക്കും പകരം മില്മ നെയ്യും ക്യാഷു കോര്പറേഷനിലെ കശുവണ്ടി പരിപ്പും കിറ്റില് ഇടം പിടിച്ചു. സപ്ലൈകോയുടെ സ്വന്തം ശബരി ബ്രാന്ഡ് ഉത്പന്നങ്ങള്. പഞ്ചസാരയും, ചെറുപയറും, തുവരപരിപ്പും മറ്റ് സംസ്ഥാനങ്ങളില് നിന്ന്.
14 ഉത്പന്നങ്ങള് അടങ്ങിയ കിറ്റിന് 434 രൂപയാണ് കുറഞ്ഞത് ചെലവ്. ലോഡിംഗ് വണ്ടിക്കൂലി ഉള്പെടെ 447 രൂപയുടെ കിറ്റ് എല്ലാ ജില്ലകളിലും തയ്യാറായി.
തിരുവനന്തപുരത്ത് തിങ്കളാഴ്ച വൈകീട്ടാകും മുഖ്യമന്ത്രി ഭക്ഷ്യകിറ്റ് വിതരണം ഉദ്ഘാടനം ചെയ്യുക. തുടര്ന്ന് ചൊവ്വാഴ്ച രാവിലെ മുതല് റേഷന് കടകളില് ലഭ്യമായി തുടങ്ങും. അന്ത്യോദയ കാര്ഡ് ഉടമകള്ക്ക് ആദ്യം കിറ്റ് ഉറപ്പാക്കി മുന്ഗണന അനുസരിച്ച് ഓണത്തിന് മുന്പെ വിതരണം പൂര്ത്തിയാക്കാനാണ് ലക്ഷ്യം.
Powered by Info News For You
Comments
Post a Comment