ഉത്രാടം തിരുനാള് മാര്ത്താണ്ഡവര്മുടെ പ്രിയപ്പെട്ട കാര് ഇനി യൂസഫലിക്ക് സ്വന്തം
തിരുവനന്തപുരം: (www.kvartha.com 04.04.2022) ഉത്രാടം തിരുനാള് മാര്ത്താണ്ഡവര്മ ഉപയോഗിച്ചിരുന്ന ബെന്സ് കാര് അദ്ദേഹത്തിന്റെ ആത്മമിത്രമായ ലുലു ഗ്രൂപ് ചെയര്മാന് എംഎ യൂസഫലിക്ക് സ്വന്തം. തിരുവിതാംകൂര് മഹാരാജാവായിരുന്ന ചിത്തിര തിരുനാള് ബാലരാമവര്മയുടെ അനുജനായിരുന്ന ഉത്രാടം തിരുനാള് വര്ഷങ്ങളോളം ഉപയോഗിച്ച കാന് 42 എന്ന ബെന്സ് കാറാണ് ആത്മബന്ധത്തിന്റെയും സൗഹാര്ദത്തിന്റെയും അടയാളമായി യൂസഫലിക്ക് സമ്മാനിക്കുന്നത്.
കവടിയാര് കൊട്ടാരത്തില് സൂക്ഷിച്ചിരിക്കുന്ന 1955 മോഡല് മെഴ്സിഡീസ് ബെന്സ് 180 T കാര് യൂസഫലിക്ക് സമ്മാനിക്കും. ജര്മനിയില് നിര്മിച്ച ബെന്സ് 12,000 രൂപ നല്കിയാണ് 1950കളില് രാജകുടുംബം സ്വന്തമാക്കുന്നത്. കര്ണാടകയില് രെജിസ്ട്രേഷന് നടത്തിയ കാര് വാഹനപ്രേമിയായ മാര്ത്താണ്ഡവര്മയുടെ ശേഖരത്തിലെ ഏറ്റവും പ്രിയപ്പെട്ടതും ആയിരുന്നു. ബെംഗ്ളൂറില് താമസിക്കുമ്പോള് യാത്രയ്ക്ക് ഈ കാറാണ് അദ്ദേഹം ഉപയോഗിച്ചിരുന്നത്.
38-ാം വയസില് തുടങ്ങി സ്വയം ഓടിച്ചും യാത്രക്കാരനായും 40 ലക്ഷം മൈലുകള് മാര്ത്താണ്ഡവര്മ സഞ്ചരിച്ചെന്നാണ് കണക്ക്. ഇതില് 23 ലക്ഷം മൈലുകളും ഈ ബെന്സില് തന്നെ. താണ്ടിയ ദൂരം അടയാളപ്പെടുത്തി ബെന്സ് കമ്പനി നല്കിയ മെഡലുകളും വാഹനത്തിനു മുന്നില് പതിച്ചിട്ടുണ്ട്. 85ാം വയസിലും മാര്ത്താണ്ഡവര്മ ഇതേ വാഹനം ഓടിച്ചു.
റെകോര്ഡ് ദൂരം സഞ്ചരിച്ച ബെന്സിനെ അഭിമാന ചിഹ്നമായി മാറ്റാന് ബെന്സ് കംപനി തന്നെ ആഗ്രഹിച്ചിരുന്നു. തിരിച്ചെടുക്കാമെന്നും പകരം രണ്ട് പുതിയ കാറുകള് നല്കാമെന്നും പറഞ്ഞ് കംപനിയിലെ ഉന്നതര് അദ്ദേഹത്തെ സമീപിച്ചു. എന്നാല് വാച്ച് മുതല് 1936ല് വാങ്ങിയ റോളി ഫ്ലക്സ് ക്യാമറയും കാറും ഉള്പെടെ പുരാതനമായ എല്ലാ വസ്തുക്കളെയും പൊന്നുപോലെ സൂക്ഷിച്ചിരുന്ന മാര്ത്താണ്ഡവര്മ കാറിനെ കൈവിട്ടില്ല.
കാറിന് മോഹവില നല്കി വാങ്ങാന് പല പ്രമുഖരും അദ്ദേഹത്തെ സമീപിച്ചിരുന്നു. എന്നാല് ആത്മമിത്രമായ യൂസഫലിക്ക് കാര് കൈമാറാനായിരുന്നു ഉത്രാടം തിരുനാളിന്റെ തീരുമാനം. യൂസഫലിയെ അബൂദബിയിലെ വസതിയിലെത്തി സന്ദര്ശിച്ച മാര്ത്താണ്ഡവര്മ അദ്ദേഹത്തെ കവടിയാര് കൊട്ടാരത്തിലേക്ക് ക്ഷണിച്ചു. 2012 ല് യൂസഫലി പട്ടം കൊട്ടാരത്തില് എത്തിയപ്പോള് കാര് സമ്മാനിക്കാനുള്ള ആഗ്രഹം ഉത്രാടം തിരുനാള് അറിയിച്ചു.
ഉത്രാടം തിരുനാളിന്റെ മരണശേഷമാണ് കാര് യൂസഫലിക്ക് സമ്മാനിക്കാന് രാജകുടുംബം തീരുമാനിച്ചത്. കാര് ഏറെക്കാലമായി മകന് പത്മനാഭ വര്മയുടെയും ഉത്രാടം തിരുനാള് മാര്ത്താണ്ഡ വര്മ ഫൗന്ഡേഷന്റെയും സംരക്ഷണയിലാണ്. ഉത്രാടം തിരുനാളിന്റെ ആഗ്രഹ പ്രകാരം വൈകാതെ തന്നെ കാര് യൂസഫലിക്ക് സമ്മാനിക്കും.
Powered by Info News For You
Comments
Post a Comment