ലഹരിയിടപാടുമായി ബന്ധപ്പെട്ട കള്ളപ്പണക്കേസ്; സംശയംവച്ച് മാത്രം ജാമ്യം നിഷേധിക്കാനാവില്ല; ബിനീഷിനെതിരെ നേരിട്ടുള്ള തെളിവ് ഹാജരാക്കാന് അന്വേഷണ ഏജന്സിക്ക് കഴിഞ്ഞിട്ടില്ലെന്ന് കര്ണാടക ഹൈകോടതി
ബെംഗ്ളൂറു: (www.kvartha.com 21.11.2021) ലഹരിയിടപാടുമായി ബന്ധപ്പെട്ട കള്ളപ്പണക്കേസില് ബിനീഷിനെതിരെ നേരിട്ടുള്ള തെളിവ് ഹാജരാക്കാന് അന്വേഷണ ഏജന്സിക്ക് കഴിഞ്ഞിട്ടില്ലെന്ന് കര്ണാടക ഹൈകോടതി. അതിനാല് സംശയംവച്ച് മാത്രം ജാമ്യം നല്കാതിരിക്കാന് കഴിയില്ലെന്ന് കോടതി വ്യക്തമാക്കി. ബിനീഷിന് ജാമ്യം അനുവദിച്ചുകൊണ്ടുള്ള വിധിയിലാണ് ഹൈകോടതി പരാമര്ശം.
എന്ഫോഴ്സ്മെന്റ് ഡയറക്ടറേറ്റ് കേസില് ബെംഗ്ളൂറിലെ കോടതിയിലാണ് വിചാരണ നടപടികള് പുരോഗമിക്കുന്നത്. എപ്പോള് വിളിപ്പിച്ചാലും കോടതിയില് ഹാജരാകണം രാജ്യം വിട്ടുപോകരുത് തുടങ്ങിയ ഉപാധികളോടെയാണ് കോടതി ജാമ്യം അനുവദിച്ചിരുന്നത്. വിധി പകര്പിലെ വിശദാംശങ്ങള് പുറത്ത് വിട്ടു.
ഇപ്പോള് ജാമ്യം ലഭിച്ചെങ്കിലും ബിനീഷിന് പൂര്ണമായും ആശ്വസിക്കാനായിട്ടില്ല എന്നാണ് റിപോര്ട്. നാര്കോടിക് കണ്ട്രോള് ബ്യൂറോ രെജിസ്റ്റര് ചെയ്ത മയക്കുമരുന്ന് കേസില് അന്വേഷണം ഏതെങ്കിലും സാഹചര്യത്തില് ബിനീഷിലേക്കെത്തിയാല് വീണ്ടും കുരുക്ക് മുറുകും. ബിനീഷിന് ജാമ്യം നല്കിയതിനെതിരെ ഇഡി സുപ്രീം കോടതിയെ സമീപിച്ചേക്കും. കോടതിയില് രണ്ട് കേന്ദ്ര ഏജന്സികളും ഇനി സ്വീകരിക്കുന്ന നിലപാടും നിര്ണായകമാണ്.
2020 നവംബര് 11 നാണ് രണ്ടാം വട്ട ചോദ്യം ചെയ്യലിനായി ബിനീഷ് കോടിയേരിയെ ബെംഗ്ളൂറിലേക്ക് വിളിച്ചു വരുത്തി ഇഡി അറസ്റ്റ് ചെയ്യുന്നത്. ഇഡി അന്വേഷണം രാഷ്ട്രീയ പ്രേരിതമാണെന്നും കെട്ടിച്ചമച്ച കഥകള് അന്വേഷണ ഏജന്സികള് പ്രചരിപ്പിക്കുകയാണെന്നും ബിനീഷ് കോടതിയില് പറഞ്ഞിരുന്നു.
കോടിയേരി ബാലകൃഷ്ണന്റെ മകനായത് കൊണ്ട് വേട്ടയാടുകയാണെന്നും ലഹരി ഇടപാട് കെട്ടിച്ചമച്ച ആരോപണം മാത്രമാണെന്നും ആയിരുന്നു കോടതിയില് തുടക്കം മുതലേ ബിനീഷിന്റെ നിലപാട്. ഡ്രൈവര് അനിക്കുട്ടനും അരുണുമായി ഇടപാടുകളില്ല. അനിക്കുട്ടനെ നിയന്ത്രിക്കുന്നത് താനല്ല. ഏഴുലക്ഷം മാത്രമാണ് തനിക്ക് വേണ്ടി അനിക്കുട്ടന് നിക്ഷേപിച്ചത്. മറ്റ് ഇടപാടുകള് ഒന്നും തന്റെ അറിവോടെയല്ലെന്നും ബിനീഷ് പറഞ്ഞിരുന്നു.
അകൗണ്ടിലെത്തിയത് നേരായ കച്ചവടത്തിലെ ലാഭം മാത്രമാണ്. ലാഭവിഹിതത്തിലെ ആദായ നികുതി കൃത്യമായി അടച്ചതാണ്. ഇഡിക്ക് ഇത് ബോധ്യപ്പെടാത്തത് രാഷ്ട്രീയസമ്മര്ദം കാരണമെന്നും ബിനീഷ് കോടതിക്ക് മുന്നില് പറഞ്ഞിരുന്നു.
Powered by Info News For You
Comments
Post a Comment