ലഖിംപൂര് ഖേരി സംഘര്ഷം; 4 പേര് കൂടി അറസ്റ്റില്; ഉത്തരേന്ത്യന് സംസ്ഥാനങ്ങളിലെ ട്രെയിന് ഗതാഗതത്തെ കാര്യമായി ബാധിച്ച് കര്ഷക സമരം
ന്യൂഡെല്ഹി: (www.kvartha.com 19.10.2021) ഉത്തര്പ്രദേശിലെ ലഖിംപൂര് ഖേരിയിലെ സംഘര്ഷത്തില് നാലുപേരെ കൂടി ക്രൈംബ്രാഞ്ച് അറസ്റ്റ് ചെയ്തു. സുമിത് ജെയ്സ് വാള്, നന്ദന് സിംഗ് ഭിഷ്ട്, ശിശുപാല്, സത്യപ്രകാശ് ത്രിപാതി എന്നിവരെയാണ് അറസ്റ്റ് ചെയ്തത്. സുമിത് ജെയ്സ് വാള് സംഭവസ്ഥലത്ത് നിന്നും ഓടി രക്ഷപ്പെടുന്ന വീഡിയോ നേരത്തെ പുറത്ത് വന്നിരുന്നു.
ലഖിംപൂരില് നാല് കര്ഷകരുള്പെടെ ഒന്പത് പേരാണ് കൊല്ലപ്പെട്ടത്. കര്ഷകരെ വാഹനമിടിച്ച് കൊലപ്പെടുത്തിയെന്ന സംഭവത്തില് ഗൂഡാലോചന നടത്തിയത് കേന്ദ്ര മന്ത്രി അജയ് മിശ്രയെന്നാണ് കര്ഷകരുടെ ആരോപണം. കര്ഷകരെ ഇടിച്ച വാഹനത്തില് ഉണ്ടായിരുന്ന അജയ് മിശ്രയുടെ മകന് ആശിഷ് മിശ്രയെ പൊലീസ് അറസ്റ്റ് ചെയ്തിട്ടുണ്ട്.
അതേസമയം, ലഖിംപൂര് ഖേരി സംഭവത്തില് കേന്ദ്ര മന്ത്രി അജയ് മിശ്രക്കെതിരെ നടപടി ആവശ്യപ്പെട്ട് തിങ്കളാഴ്ച രാജ്യവ്യാപകമായി ട്രെയിനുകള് തടഞ്ഞ് കര്ഷകര് പ്രതിഷേധിച്ചു. നഗരങ്ങളിലും ഗ്രാമങ്ങളിലും ഒരുപോലെ കര്ഷകര് റെയില്വെ പാളങ്ങളില് കുത്തിയിരുന്ന് പ്രതിഷേധിച്ചു. സമരം ഉത്തരേന്ത്യന് സംസ്ഥാനങ്ങളിലെ ട്രെയിന് ഗതാഗതത്തെ കാര്യമായി ബാധിച്ചു. പഞ്ചാബിലും, ഹരിയാനയിലും ട്രെയിന് ഗതാഗതം ഏതാണ്ട് പൂര്ണമായി തടസപ്പെട്ടു. യു പി, ബീഹാര്, മധ്യപ്രദേശ്, മഹാരാഷ്ട്ര, കര്ണാടക, പശ്ചിമ ബംഗാള്, ഒഡീഷ ഉള്പെടെയുള്ള സംസ്ഥാനങ്ങളിലും കര്ഷകരുടെ സമരം ട്രെയിന് ഗതാഗതത്തെ ബാധിച്ചു.
നിരോധനാജ്ഞ ലംഘിച്ചായിരുന്നു ലക്നൗവിലെ റെയില്പാളങ്ങളില് കര്ഷകരുടെ പ്രതിഷേധം. യുപിയിലും മധ്യപ്രദേശിലും സമരത്തിനെത്തിയ കര്ഷകരെ പലയിടങ്ങളിലും പൊലീസ് അറസ്റ്റ് ചെയ്തു. നിരവധി കര്ഷകരെ വീട്ടുതടങ്കലിലാക്കി.
Powered by Info News For You
Comments
Post a Comment