മുല്ലപ്പെരിയാറില് ജലനിരപ്പില് നേരിയ കുറവ്; 138.85 അടിയായി; മന്ത്രിമാര് അണക്കെട്ട് സന്ദര്ശിക്കും, സ്പില്വേ വഴി കൂടുതല് ജലം ഒഴുകി എത്തിയതോടെ പെരിയാറിലെ ജലനിരപ്പ് 3 അടിയോളം ഉയര്ന്നു
ഇടുക്കി: (www.kvartha.com 31.10.2021) മുല്ലപ്പെരിയാറില് അണക്കെട്ടിലെ ജലനിരപ്പില് നേരിയ കുറവ്. 138.95 അടിയില് നിന്ന് 138.85 അടിയിലേക്കാണ് താഴ്ന്നത്. സ്പില്വേയിലെ ആറു ഷടറുകള് തുറന്ന് വെള്ളം പുറത്തേക്ക് ഒഴുക്കിയിട്ടും അണക്കെട്ടിലെ ജലനിരപ്പ് നിലവിലെ റൂള് കര്വില് നിജപ്പെടുത്താന് തമിഴ്നാടിന് കഴിഞ്ഞിട്ടില്ല.
സെകന്ഡില് 2974 ഘനയടി വെള്ളമാണ് സ്പില്വേയിലൂടെ ഇടുക്കിയിലേക്ക് ഒഴുക്കുന്നത്. 2340 ഘനയടി വീതം തമിഴ്നാട് കൊണ്ടു പോകുന്നുണ്ട്. ഞായറാഴ്ച രാത്രിവരെ പരമാവധി സംഭരിക്കാന് കഴിയുന്നത് 138 അടിയാണ്. ഈ സാഹചര്യത്തില് ജലനിരപ്പ് ക്രമീകരിക്കാന് തമിഴ്നാട് കൂടുതല് വെള്ളം തുറന്നുവിടാന് സാധ്യതയുണ്ട്.
അതേസമയം മുല്ലപ്പെരിയാറില് ഡാമിലെ ജലനിരപ്പ് താഴ്ത്താനായി ശനിയാഴ്ച വൈകിട്ടോടെ മൂന്ന് ഷടറുകള് കൂടി തുറന്നിരുന്നു. നേരത്തെ തുറന്ന മൂന്ന് ഷടറുകള്ക്ക് പുറമെയാണ് ശനിയാഴ്ച വൈകിട്ട് മൂന്നെണ്ണം കൂടി തുറന്നത്. ഇതോടെ ആകെ ആറ് ഷടറുകളിലൂടെ ഡാമില് നിന്നും പുറത്തേക്ക് കളയുകയാണ്. ഇതോടെ ആകെ പുറത്തേക്ക് ഒഴുക്കുന്ന വെള്ളം 2974 ഘനയടിയായിട്ടുണ്ട്.
മന്ത്രി റോഷി അഗസ്റ്റിനും ഉദ്യോഗസ്ഥരും തേക്കടിയില് ക്യാംപ് ചെയ്താണ് കാര്യങ്ങള് ഏകോപിപ്പിക്കുന്നത്. മന്ത്രിമാരായ റോഷി അഗസ്റ്റിനും, പി പ്രസാദും ഞായറാഴ്ച മുല്ലപ്പെരിയാര് സന്ദര്ശിക്കും. സ്പില്വേ വഴി കൂടുതല് ജലം ഒഴുകി എത്തിയതോടെ പെരിയാറിലെ ജലനിരപ്പ് മൂന്നടിയോളം ഉയര്ന്നിട്ടുണ്ട്.
ഡാമിലേക്കുള്ള നീരൊഴുക്ക് കുറയുന്നില്ലെന്ന് ജലവിഭവമന്ത്രി റോഷി അഗസ്റ്റിന് പറഞ്ഞു. തമിഴ്നാടിനോട് കൂടുതല് വെള്ളം കൊണ്ടു പോകാന് ആവശ്യപ്പെട്ടിട്ടുണ്ടെന്നും അല്ലാതെ ജലനിരപ്പ് താഴ്ത്താനാവില്ലെന്നും മന്ത്രി ശനിയാഴ്ച വ്യക്തമാക്കിയിരുന്നു.
Powered by Info News For You
Comments
Post a Comment