സംസ്ഥാനത്ത് സ്കൂള് തുറക്കാനുള്ള ആലോചനയുമായി സംസ്ഥാന സര്കാര്; പ്രായോഗികത പരിശോധിക്കാന് വിദഗ്ധ സമിതിയെ നിയോഗിക്കുമെന്ന് വിദ്യാഭ്യാസ മന്ത്രി
തിരുവനന്തപുരം: (www.kvartha.com 02.09.2021) സംസ്ഥാനത്ത് സ്കൂള് തുറന്ന് ക്ലാസുകള് ആരംഭിക്കാനുള്ള ആലോചനയുമായി സര്കാര്. ഇതുമായി ബന്ധപ്പെട്ട പ്രായോഗികത പരിശോധിക്കാന് വിദഗ്ധ സമിതിയെ നിയോഗിക്കുമെന്ന് വിദ്യാഭ്യാസ മന്ത്രി വി ശിവന്കുട്ടി മാധ്യമങ്ങളോട് വ്യക്തമാക്കി.
വിദഗ്ധ സമിതിയുടെ റിപോര്ട് വന്ന ശേഷം മുഖ്യമന്ത്രിയുമായി ചര്ച്ച നടത്തി ഇക്കാര്യത്തില് തീരുമാനമെടുക്കുമെന്നും അദ്ദേഹം കൂട്ടിച്ചേര്ത്തു. പ്ലസ് വണ് പരീക്ഷയുമായി ബന്ധപ്പെട്ട് ക്ലാസ് മുറികള് ശുചീകരിക്കുന്നതിന്റെ ഉദ്ഘാടനത്തിന് എത്തിയപ്പോഴാണ് മന്ത്രി ഇക്കാര്യം മാധ്യമങ്ങളോട് പറഞ്ഞത്.
അയല് സംസ്ഥാനമായ തമിഴ്നാടിലും, കര്ണാടകയിലും മറ്റ് സംസ്ഥാനങ്ങളിലും ഉള്പെടെ സ്കൂളുകള് തുറന്ന സാഹചര്യത്തിലാണ് കേരളത്തിലും അതിന്റെ പ്രായോഗികത പരിശോധിക്കുന്നത്. ഇതിനായി നിയോഗിക്കുന്ന വിദഗ്ധ സമിതിയുടെ അഭിപ്രായം അറിഞ്ഞ ശഷമാകും സ്കൂള് തുറക്കുന്നതിനുള്ള മാനദണ്ഡങ്ങള് തയാറാക്കുക. കുട്ടികള്ക്ക് വാക്സിന് നല്കിയതിന് ശേഷം സ്കൂളുകള് തുറന്നാല് മതി എന്നായിരുന്നു നേരത്തെ തീരുമാനിച്ചിരുന്നത് എന്നും മന്ത്രി വ്യക്തമാക്കി.
സ്കൂളുകള് തുറക്കാമെന്ന അഭിപ്രായമാണ് വിദഗ്ധര് മുന്നോട്ടുവച്ചതെന്നും മന്ത്രി കൂട്ടിച്ചേര്ത്തു. വിദഗ്ധ സമിതിയുടെ റിപോര്ടും വിദ്യാഭ്യാസ വകുപ്പിന്റെ പ്രോജക്ട് റിപോര്ടും മുഖ്യമന്ത്രിക്ക് സമര്പിക്കും. മുഖ്യമന്ത്രി സമിതിയുമായി തീരുമാനിച്ച് ബാക്കി കാര്യങ്ങള് തീരുമാനിക്കുമെന്ന് മന്ത്രി അറിയിച്ചു.
അതിനിടെ, എന്തു ചെയ്താലും വിദ്യാഭ്യാസ വകുപ്പിനെ സോഷ്യല് മീഡിയില് വിമര്ശിക്കാന് ചിലരുണ്ടെന്ന് മന്ത്രി കുറ്റപ്പെടുത്തി. പ്ലസ് വണ് പരീക്ഷയില് ഇടവേള വേണമെന്നായിരുന്നു ആവശ്യം. അത് കൊടുത്തപ്പോള് ഇപ്പോള് ഒരുമിച്ചെഴുതാമെന്ന് പറയുന്നു. എന്തിനെയും വിമര്ശിക്കുന്ന അവസ്ഥയാണ് ഉള്ളതെന്നും മന്ത്രി പരിഭവിച്ചു.
Keywords: Kerala Government Will Consider School Reopening In A Phased Manner: Education Minister, Thiruvananthapuram, News, School, Education, Minister, Students, Media, Kerala.
Powered by Info News For You
Comments
Post a Comment