ഉടമകൾ അറിയാതെ ബാങ്ക് അകൗണ്ടുകളിൽ നിന്ന് പണം തട്ടിയതായി പരാതി

കോഴിക്കോട്: (www.kvartha.com 25.03.2021) ഉടമകള്‍ അറിയാതെ ബാങ്ക് അകൗണ്ടുകളില്‍ നിന്ന് പണം തട്ടിയതായി പരാതി. 11 പേരാണ് ഇതിനകം തന്നെ വടകര പൊലീസ് സ്റ്റേഷനില്‍ പരാതിയുമായി എത്തിയത്. 1,85,000 ത്തില്‍ അധികം രൂപയാണ് ഇവരുടെ അകൗണ്ടുകളില്‍ നിന്ന് നഷ്ടപ്പെട്ടത്.

എഞ്ചിനീയറിംഗ് വിദ്യാര്‍ഥി വടകര മേപ്പയില്‍ കളരിപ്പറമ്പത്ത് അപര്‍ണയുടെ 20,000 രൂപയാണ് നഷ്ടമായത്. ശനിയാഴ്ച വൈകീട്ട് 3.55 നാണ് 10,000 രൂപ വീതം രണ്ട് തവണയായി എസ്ബിഐ അകൗണ്ടില്‍ നിന്ന് അജ്ഞാതന്‍ പിന്‍വലിച്ചത്.

എടിഎം കാര്‍ഡ് വഴി പണം പിന്‍വിച്ചുവെന്നാണ് മൊബൈലില്‍ സന്ദേശമെത്തിയത്. എടിഎം കാര്‍ഡ് ഇവരുടെ കൈവശം തന്നെയുണ്ട്. പിന്‍ നമ്പര്‍ ആര്‍ക്കും കൈമാറിയില്ലെന്നും അപർണ പറഞ്ഞു. തലശേരി കോ ഓപറേറ്റീവ് എഞ്ചിനീയറിംഗ് കോളേജിലെ മൂന്നാം വര്‍ഷ വിദ്യാർഥിനി അപര്‍ണയുടെ സ്കോളര്‍ഷിപ് തുകയാണ് ഇങ്ങനെ തട്ടിയെടുത്തത്.

വടകര പുതിയാപ്പ്മലയില്‍ തോമസിന്‍റെ എസ്ബിഐ അകൗണ്ടില്‍ നിന്ന് നഷ്ടപ്പെട്ടത് 40,000 രൂപയാണ്. 10,000 രൂപ വീതം നാല് തവണകളായി പിന്‍വലിക്കുകയായിരുന്നു. മിനിറ്റുകളുടെ വ്യത്യാസത്തിലാണിത്. എടിഎം കാര്‍ഡിന്‍റെ വിവരങ്ങളും പിന്‍ നമ്പറും ചോര്‍ത്തിയുള്ള തട്ടിപ്പാണിതെന്നാണ് പൊലീസ് നിഗമനം. ആസൂത്രിതമായുള്ള തട്ടിപ്പിന് പിന്നില്‍ സാങ്കേതിക വിദ്യയില്‍ വളരെ അറിവുള്ളവരാണ്. ചിപുള്ള എടിഎം കാർഡിലെ വിവരങ്ങള്‍ എങ്ങനെ ചോര്‍ത്തിയെന്നാണ് പൊലീസ് അന്വേഷിക്കുന്നത്. സൈബര്‍ സെല്ലിന്‍റെ സഹായവും തേടിയിട്ടുണ്ട്. കൂടുതല്‍ പേര്‍ ചതിക്കപ്പെട്ടിട്ടുണ്ടോ എന്നും പൊലീസ് അന്വേഷിക്കുന്നുണ്ട്.

Keywords: News, Bank, Kozhikode, Vadakara, Theft, Cash, Police, Case, ATM, ATM card, Kerala, State, Top-Headlines, Bank accounts, Money, Complaint, Stolen, The complaint that money was stolen from bank accounts.

< !- START disable copy paste -->

Powered by Info News For You