അമേരികന് ആര്മിയില് ട്രാന്സ്ജെന്ഡറുകള്ക്ക് ട്രംപ് ഏര്പ്പെടുത്തിയ വിലക്ക് പ്രസിഡന്റ് ജോ ബൈഡന് നീക്കി
വാഷിംഗ്ടണ്: (https://ift.tt/3sZrQ1W) അമേരികന് ആര്മിയില് നിന്നും ട്രാന്സ്ജെന്ഡറുകളെ വിലക്കിയ മുന് പ്രസിഡന്റ് ഡോണള്ഡ് ട്രംപിന്റെ നടപടി പിന്വലിച്ച് പ്രസിഡന്റ് ജോ ബൈഡന്. തിങ്കളാഴ്ചയാണ് വിലക്ക് പിന്വലിച്ചുകൊണ്ടുള്ള ഉത്തരവില് ബൈഡന് ഒപ്പ് വെച്ചത്. വൈസ് പ്രസിഡന്റ് കമല ഹാരിസ്, പ്രതിരോധ സെക്രടറി ലോയ്ഡ് ഓസ്റ്റിന്, ചെയര്മാന് ഓഫ് ദ ജോയിന്റ് ചീഫ്സ് ഓഫ് സ്റ്റാഫ് ജനറല് മാര്ക് മില്ലേയ് എന്നിവരുടെ സാന്നിധ്യത്തിലായിരുന്നു ബൈഡന് ഉത്തരവില് ഒപ്പ് വെച്ചത്.
'ഇത്രയേ ഉള്ളൂ കാര്യം: സേവനമനുഷ്ടിക്കാന് സാധിക്കുന്നവര്ക്കെല്ലാം അഭിമാനത്തോടെ മറച്ചുവെക്കലുകളില്ലാതെ അത് ചെയ്യാന് സാധിക്കുമ്പോഴാണ് അമേരിക കൂടുതല് സുരക്ഷിതസ്ഥാനമാവുന്നത്,' ബൈഡന് ട്വീറ്റ് ചെയ്തു.
തെരഞ്ഞെടുപ്പ് പ്രചരണറാലികളില് ബൈഡന് പ്രഖ്യാപിച്ച പ്രധാന വാഗ്ദാനങ്ങളിലൊന്നായിരുന്നു ഇത്. രാജ്യത്തെ ലൈംഗിക ന്യൂനപക്ഷ സമൂഹങ്ങള് ബൈഡന്റ് നടപടിയെ അഭിനന്ദിച്ച് രംഗത്തെത്തി.
അതേസമയം ബൈഡന്റെ നടപടിയെ അഭിനന്ദിച്ചുകൊണ്ട് നിരവധി പേര് രംഗത്തെത്തിയെങ്കിലും ഈ വിഷയത്തില് കൂടുതല് ശക്തമായ നടപടികള് ആവശ്യമാണെന്നാണ് മനുഷ്യാവകാശ പ്രവര്ത്തകര് ചൂണ്ടിക്കാണിക്കുന്നത്.
ട്രാന്സ്ജെന്ഡര് വ്യക്തികളെ സേനയില് അനുവദിക്കണോ വേണ്ടയോ എന്ന് തീരുമാനിക്കുന്നത് പ്രസിഡന്റിന്റെ അധികാരത്തിന് മാത്രമായി വിടുന്നത് ശരിയായ നടപടിയല്ലെന്ന് ഇവര് പറയുന്നു. ട്രംപ് ഏര്പ്പെടുത്തിയ തരത്തിലുള്ള വിലക്കുകള് വരുംകാലങ്ങളില് ആവര്ത്തിക്കാനുള്ള സാധ്യതയുണ്ടെന്നും ഇവര് ചൂണ്ടിക്കാണിക്കുന്നു.
ഈ വര്ഷത്തെ പ്രതിരോധ പോളിസി ബില്ലില് ലിംഗപരമായ വിവേചനം ഒഴിവാക്കിക്കൊണ്ടുള്ള നിര്ദേശം ഉള്പ്പെടുത്തണം. സേവനം അനുഷ്ടിക്കാന് യോഗ്യതയുള്ളവര്ക്കെല്ലാം അമേരികന് ആര്മിയില് ചേരാന് സാധിക്കണമെന്നും കോണ്ഗ്രസ് പ്രതിനിധി ജാക്കി സ്പെയര് പറഞ്ഞു.
2016ല് നടത്തിയ റാന്ഡ് കോര്പറേഷന് എന്ന യുഎസ് പോളിസി റിസര്ച് ഇൻസ്റ്റിറ്റ്യൂട് പുറത്തുവിട്ട കണക്കുകള് പ്രകാരം 2,450 ട്രാന്സ്ജെന്ഡര് വ്യക്തികള് സൈന്യത്തിലുണ്ട്.
2016ല് മുന് പ്രസിഡന്റ് ബറാക് ഒബാമ ട്രാന്സ്ജെന്ഡര് വ്യക്തികള്ക്ക് സേനയില് പ്രവര്ത്തിക്കാന് അനുവദിച്ചുകൊണ്ടുള്ള ഉത്തരവിറക്കിയിരുന്നു. ലിംഗമാറ്റ ശസ്ത്രക്രിയക്ക് ആവശ്യമായ വൈദ്യസഹായം ഉറപ്പുവരുത്തുന്നതിനുള്ള നടപടികള് കൂടി ഉള്പ്പെടുന്നതായിരുന്നു ഈ നടപടി. എന്നാല് ട്രംപ് അധികാരത്തിലെത്തിയതിന് പിന്നാലെ ഈ ഉത്തരവ് പിന്വലിക്കുകയും ട്രാന്സ്ജെന്ഡര് വ്യക്തികളുടെ റിക്രൂട്മെന്റ് തടയുകയും ചെയ്തു. നിലവില് സൈന്യത്തിലുള്ളവരെ മാത്രമേ തുടരാന് അനുവദിച്ചുള്ളു.
Powered by Info News For You
Comments
Post a Comment