റിപബ്ലിക് ദിനത്തില് അവകാശ പോരാട്ട മുദ്രാവാക്യങ്ങള് ഉയര്ത്തി ആരംഭിച്ച കര്ഷക മാര്ച്ച് തടഞ്ഞ് പൊലീസ്; കണ്ണീര്വാതകം പ്രയോഗിച്ചു
ന്യൂഡല്ഹി: (https://ift.tt/3sZrQ1W) റിപബ്ലിക് ദിനത്തില് അവകാശ പോരാട്ട മുദ്രാവാക്യങ്ങള് ഉയര്ത്തി ആരംഭിച്ച കര്ഷക മാര്ച്ച് പൊലീസ് തടഞ്ഞു. പൊലീസും കര്ഷകരും നേര്ക്കുനേര് നിലയുറപ്പിച്ചിരിക്കുകയാണ്. പൊലീസ് കണ്ണീര്വാതകം പ്രയോഗിച്ചു. മുന്കൂര് നിശ്ചയിച്ചിരുന്നതിലും നേരത്തെയാണ് കര്ഷക മാര്ച്ച് ആരംഭിച്ചത്.
നേരത്തെ, സിംഘു, തിക്രി അതിര്ത്തികളില് ബാരിക്കേഡുകള് മറികടന്ന് ഡെല്ഹിയിലേക്കു പ്രവേശിച്ച കര്ഷകരെ പിന്തിരിപ്പിക്കാനുള്ള പൊലീസ് ശ്രമം പരാജയപ്പെട്ടു. തുടര്ന്ന് ഇവര് സഞ്ജയ് ഗാന്ധി ഗ്രാന്സ്പോര്ട് നഗറില് പ്രവേശിച്ചു. അവിടെ ബാരികേഡ് സ്ഥാപിച്ച് പൊലീസ് മാര്ച്ച് തടഞ്ഞു.
ട്രാക്ടര് റാലിക്ക് പിന്നാലെ സമരം ശക്തമാക്കുന്നതിന്റെ ഭാഗമായി ബജറ്റ് ദിനമായ ഫെബ്രുവരി ഒന്നിന് പാര്ലമെന്റിലേക്ക് കാല്നട മാര്ച്ച് കര്ഷകസംഘടനകള് പ്രഖ്യാപിച്ചിട്ടുണ്ട്. സമരഭൂമിയില് നിന്ന് പാര്ലമെന്റിലേക്ക് മാര്ച്ച് നടത്താനാണ് തീരുമാനം.
കര്ഷകരുമായി കേന്ദ്രം നടത്തിയ പതിനൊന്നാം വട്ട ചര്ച്ചയും പരാജയമായിരുന്നു. കാര്ഷിക നിയമങ്ങള് പൂര്ണ്ണമായി പിന്വലിക്കണമെന്ന കര്ഷക നേതാക്കളുടെ ആവശ്യം പൂര്ണ്ണമായി അംഗീകരിക്കാന് കഴിയുന്നതല്ലെന്നാണ് കേന്ദ്രം പറഞ്ഞത്.
ഏറ്റവും കുറഞ്ഞത് ഒരു പതിനെട്ട് മാസത്തേക്ക് നിയമം നടപ്പാക്കാതിരിക്കാന് ഉത്തരവിടാമെന്നും നിയമം പൂര്ണ്ണമായി പിന്വലിക്കാന് കഴിയില്ലെന്നുമാണ് കേന്ദ്രത്തിന്റെ നിലപാട്.
എന്നാല് ഇത് അംഗീകരിക്കാന് കര്ഷക സംഘടന നേതാക്കള് തയ്യാറായില്ല. അതോടെ 11ാം ഘട്ട ചര്ച്ചയും തീരുമാനമാകാതെ അവസാനിപ്പിക്കുകയായിരുന്നു. അടുത്ത ഘട്ട ചര്ച്ചകളുടെ തീയതി നിശ്ചയിക്കാതെയാണ് കൂടിക്കാഴ്ച അവസാനിച്ചത്.
പത്താംഘട്ട ചര്ച്ചയില് ഒന്നര വര്ഷത്തേക്ക് കാര്ഷിക നിയമം നടപ്പിലാക്കില്ലെന്നും ഒരു പ്രത്യേക കമ്മിറ്റിയെ വെച്ച് കര്ഷകരുടെ ആവശ്യങ്ങള് പഠിക്കുമെന്നും കേന്ദ്ര സര്കാര് പറഞ്ഞിരുന്നു. എന്നാല് കര്ഷകര് ഇത് നിരസിക്കുകയായിരുന്നു.
Powered by Info News For You
Comments
Post a Comment