ബെംഗളൂരു ലഹരി മരുന്ന് കേസില് ആറ് മണിക്കൂര് നേരത്തെ ചോദ്യം ചെയ്യലിനൊടുവില് ബിനീഷ് കോടിയേരിയുടെ അറസ്റ്റ് രേഖപ്പെടുത്തി
ബെംഗളൂരു:(https://ift.tt/35KwDcN) ലഹരിമരുന്നു കേസുമായി ബന്ധപ്പെട്ട പണമിടപാടില് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന് ബിനീഷ് കോടിയേരിയെ എന്ഫോഴ്സ്മെന്റ് ഡയറക്ടറേറ്റ് (ഇഡി) അറസ്റ്റ് ചെയ്തു. ബിനീഷിനെ വ്യാഴാഴ്ച രാവിലെ ഇഡിയുടെ ബെംഗളൂരുവിലെ ഓഫിസില് വിളിച്ചുവരുത്തി ചോദ്യം ചെയ്തിരുന്നു.
തുടര്ന്ന് ആറു മണിക്കൂര് നേരമാണ് ബിനീഷിനെ ചോദ്യം ചെയ്തത്. ചോദ്യം ചെയ്യലിനുശേഷം ഇഡി ഓഫിസില്വച്ചുതന്നെയാണ് കസ്റ്റഡിയിലെടുത്തത്. ഇവിടെനിന്നു ബിനീഷിനെ പുറത്തേക്കു കൊണ്ടുപോയി. ബെംഗളൂരു സിറ്റി സിവില് കോടതിയില് ഹാജരാക്കിയേക്കുമെന്നാണ് വിവരം.
കേസില് നേരത്തേ അറസ്റ്റിലായ അനൂപ് മുഹമ്മദിനെ ചോദ്യംചെയ്തതിനു പിന്നാലെയാണ് ബിനീഷിനെയും ചോദ്യം ചെയ്തത്. അതീവ രഹസ്യമായാണ് ബിനീഷ് ഇഡി ഓഫിസില് എത്തിയത്. ലഹരിമരുന്നു കേസില് മൂന്നാം തവണയാണ് ബിനീഷിനെ ഇഡി ചോദ്യം ചെയ്തത്.
ലഹരിമരുന്ന് കേസുമായി ബന്ധപ്പെട്ട് ബിനീഷും പ്രതിയായ അനൂപ് മുഹമ്മദും തമ്മില് നടത്തിയെന്ന് പറയുന്ന സാമ്പത്തിക ഇടപാടുകളുടെ സ്രോതസ്സാണ് ഇഡി അന്വേഷിക്കുന്നത്.
ബെംഗളൂരു ലഹരിമരുന്ന് കേസില് എന്സിബി അറസ്റ്റ് ചെയ്ത അനൂപ് മുഹമ്മദിന്റെ മൊഴികളുടെ അടിസ്ഥാനത്തിലാണ് ബിനീഷിനെയും ചോദ്യം ചെയ്യാന് തീരുമാനിച്ചത്. ബെംഗളൂരുവിലെ ഹോട്ടല് ബിസിനസിനടക്കം ബിനീഷ് വലിയ തുക നല്കിയിരുന്നതായി അനൂപ് നേരത്തെ മൊഴി നല്കിയിരുന്നു. ഇക്കാര്യം ബിനീഷ് കോടിയേരിയും സ്ഥിരീകരിച്ചിരുന്നു. എന്നാല്, ലഹരിമരുന്ന് കേസുമായി തനിക്ക് യാതൊരു ബന്ധവുമില്ലെന്നും ബിനീഷ് വ്യക്തമാക്കിയിട്ടുണ്ട്. നേരത്തെ നടന്ന ചോദ്യം ചെയ്യലിലും അനൂപിന്റെ ലഹരിമരുന്ന് ബിസിനസിനെ കുറിച്ച് തനിക്ക് അറിയില്ലെന്ന് ബിനീഷ് മൊഴി നല്കിയിട്ടുണ്ട്.
ചോദ്യം ചെയ്യലില് ബിനീഷ് തനിക്ക് ഹോട്ടല് തുടങ്ങാന് ആറ് ലക്ഷം രൂപ സഹായിച്ചിട്ടുണ്ടെന്നും അനൂപ് മൊഴി നല്കി. പിന്നീട് ബെംഗളൂരു കേന്ദ്രീകരിച്ച് ബിനീഷ് രണ്ട് ബിസിനസ്സ് സ്ഥാപനങ്ങള് രജിസ്റ്റര് ചെയ്ത വിവരവും പുറത്ത് വന്നു. എന്നാല് വാര്ഷിക റിട്ടേണുകള് സമര്പ്പിക്കാത്തതിനെ തുടര്ന്ന് കേന്ദ്ര കമ്പനി കാര്യ മന്ത്രാലയം കമ്പനിയുടെ രജിസ്ട്രേഷന് സസ്പെന്ഡ് ചെയ്തിരുന്നു.
Powered by Info News For You
Comments
Post a Comment