'ഞാനാണ് കൊന്നത്, ഞാനാ ചെയ്തത്', മാധ്യമങ്ങള്‍ക്ക് മുന്നില്‍ പൊട്ടിക്കരഞ്ഞുകൊണ്ട് കുറ്റമേറ്റ് പറഞ്ഞ് സൂരജ്

പത്തനംതിട്ട: (www.kvartha.com 14.07.2020) ഉത്ര വധക്കേസില്‍ പരസ്യമായി കുറ്റമേറ്റ് പറഞ്ഞ് ഭര്‍ത്താവ് സൂരജ്. മാധ്യമങ്ങള്‍ക്ക് മുന്നില്‍ പൊട്ടിക്കരഞ്ഞുകൊണ്ട് കുറ്റമേറ്റ് പറയുകയായിരുന്നു സൂരജ്. അടൂരിലെ വീട്ടിലെത്തിച്ച് തെളിവെടുപ്പ് നടത്തുന്നതിനിടെയാണ് നാടകീയമായി സൂരജ് കുറ്റം സമ്മതിക്കുന്നത്. ആരോപണം നിങ്ങളുടെ കുടുംബത്തിന് നേരെയാണ് നീളുന്നത്, എന്താണ് പറയാനുള്ളത് എന്ന് സൂരജിനോട് മാധ്യമ പ്രവര്‍ത്തകര്‍ ചോദിച്ചപ്പോള്‍ 'ഞാനാണ് കൊന്നത്. ഞാനാ ചെയ്തത്. ചെയ്ത് പോയി.വേറെ നിവൃത്തിയില്ലാഞ്ഞിട്ടാ. അങ്ങനെ ചെയ്ത് പോയി'', എന്ന് പറഞ്ഞ് സൂരജ് കുറ്റം സമ്മതിക്കുകയായിരുന്നു.

എന്താ കാരണം, ഇതിന് വല്ല പ്രേരണയുമുണ്ടോ എന്ന് സൂരജിനോട് മാധ്യമപ്രവര്‍ത്തകര്‍ ചോദിച്ചപ്പോള്‍ ''അങ്ങനെ ചെയ്ത് പോയി, അങ്ങനെയൊന്നുമില്ല'', എന്ന് സൂരജ് പറയുന്നു. ഇതിന് വല്ല പ്രത്യേകലക്ഷ്യവുമുണ്ടായിരുന്നോ എന്ന് സൂരജിനോട് ചോദിച്ചു. ഇല്ല എന്നാണ് മറുപടി നല്‍കിയത്.

വീട്ടുകാര്‍ക്ക് പങ്കുണ്ടോ, കൊലപാതകത്തിന് വല്ല കാരണവുമുണ്ടോ എന്നു ചോദിച്ചപ്പോഴും ഇല്ലെന്നാണ് മറുപടി. കൊല്ലുക എന്ന ലക്ഷ്യത്തോടെയാണോ പാമ്പിനെ വാങ്ങിയത് എന്ന ചോദ്യത്തിന് ''ഉം, അതെ'', എന്ന് സൂരജ് പറയുന്നു. അച്ഛനും അമ്മയ്ക്കും സഹോദരിക്കും ഇതില്‍ പങ്കുണ്ടോ എന്ന ചോദ്യത്തിനെല്ലാം ഇല്ല എന്ന് മാത്രമാണ് സൂരജ് മറുപടി നല്‍കിയത്.

Keywords: Pathanamthitta, News, Kerala, Crime, Sooraj, Uthra, Case, Media, Killed, Husband, Uthra case: Sooraj publicly confesses to killing wife Uthra

Powered by Info News For You