മരണം 290 ആയി: ശ്രീലങ്കയില് അടിയന്തരാവസ്ഥ പ്രഖ്യാപിച്ചു
(www.evisionnews.co) ഈസ്റ്റര് ദിനത്തില് ശ്രീലങ്കയില് എട്ട് സ്ഥലങ്ങളിലായി ഉണ്ടായ സ്ഫോടനങ്ങള്ക്ക് പിന്നാലെ രാജ്യത്ത് അടിയന്തരാവസ്ഥ പ്രഖ്യാപിച്ചതായി ദേശീയ മാധ്യമങ്ങള്. ശ്രീലങ്കന് പ്രസിഡന്റ് മൈത്രിപാല സിരിസേനയാണ് പ്രഖ്യാപനം നടത്തിയെന്നാണ് വാര്ത്താ ഏജന്സിയായ റോയിട്ടേഴ്സ് റിപ്പോര്ട്ട് ചെയ്തിരിക്കുന്നത്. ഇന്നു അര്ദ്ധരാത്രി മുതല് അടിയന്തരാവസ്ഥ നിലവില് വരും.
പ്രാദേശിക തീവ്ര ഇസ്ലാമിക സംഘടനയായ നാഷണല് തൗഹീദ് ജമാഅത്ത് (എന്.ടി.ജെ.) ആണ് സ്ഫോടനത്തിന് പിന്നിലെന്ന് ശ്രീലങ്കന് സര്ക്കാര് പറഞ്ഞു. അതേ സമയം അന്താരാഷ്ട്ര ബന്ധമില്ലാതെ ഇവര്ക്ക് സ്ഫോടനം നടത്താനാവില്ലെന്നും ശ്രീലങ്കന് സര്ക്കാര് വ്യക്തമാക്കി.
ഈ രാജ്യത്ത് മാത്രം ഒതുങ്ങി നില്ക്കുന്ന സംഘം മാത്രമാണ് ഇതിന് പിന്നിലെന്ന് ഞങ്ങള് വിശ്വസിക്കുന്നില്ലെന്ന് ശ്രീലങ്കന് സര്ക്കാര് വക്താവ് രജിത സേനരത്നെ പറഞ്ഞു. അന്താരാഷ്ട ബന്ധമില്ലാതെ ഇത്തരത്തിലൊരു ആക്രമണം നടത്താന് സാധിക്കില്ലായിരുന്നുവെന്നും സേനരത്നെ പറഞ്ഞു. ഇതിനിടെ സ്ഫോടന പരമ്പരയില് മരിച്ചവരുടെ എണ്ണം 290 ആയി. ഞായറാഴ്ച ക്രിസ്ത്യന് പള്ളികളിലും ആഡംബര ഹോട്ടലുകളിലുമുള്പ്പെടെ എട്ടിടങ്ങളിലാണ് സ്ഫോടനമുണ്ടായത്. ഒരു മലയാളിയടക്കം നിരവധി ഇന്ത്യക്കാരും കൊല്ലപ്പെട്ടിട്ടുണ്ട്. അഞ്ഞൂറിലേറെ പേര്ക്ക് പരിക്കേറ്റിരുന്നു.
Powered by Info News For You
Comments
Post a Comment