രാഹുലിന് മുന്നില്‍ പൊട്ടിക്കരഞ്ഞ ആ അമ്മ ഒടുവില്‍ ബോധരഹിതയായി വീണു

March 14, 2019

പെരിയ: (www.kasargodvartha.com 14.03.2019) രാഹുല്‍ ഗാന്ധിക്ക് മുന്നില്‍ ഏകമകന്‍ നഷ്ടപ്പെട്ടതിന്റെ വേദന പിടിച്ചടക്കാന്‍ കഴിയാതെ പൊട്ടിക്കരഞ്ഞ ആ അമ്മ ഒടുവില്‍ ബോധരഹിതയായി വീണു. പെരിയ കല്യോട്ട് കൊല്ലപ്പെട്ട ശരത് ലാലിന്റെ വീട്ടില്‍ രാഹുല്‍ ഗാന്ധി എത്തിയപ്പോഴാണ് കണ്ടുനിന്നവരെ പോലും കണ്ണീരണിയിച്ച് അമ്മ ലതയുടെ തേങ്ങല്‍ ഉയര്‍ന്നുപൊങ്ങിയത്.

നിലവിളിയോടെയാണ് ആ അമ്മ തന്റെ സങ്കടങ്ങള്‍ രാഹുലിനോട് പറഞ്ഞത്. രാഹുല്‍ മടങ്ങിയതിന് തൊട്ടുപിന്നാലെ ബോധരഹിതയായി വീണ അവരെ പോലീസ് വണ്ടിയിലാണ് ആശുപത്രിയിലേക്ക് കൊണ്ടുപോയത്. ശരത് ലാല്‍ കൊല്ലപ്പെട്ട ദിവസും രണ്ട് തവണ അവര്‍ ബോധരഹിതയായി വീണിരുന്നു. മകന്റെ ഓരോ ഓര്‍മകള്‍ അയവിറക്കുമ്പോള്‍ കടിച്ചമര്‍ത്താനാതെ വിതുമ്പുകയാണ്.

അച്ഛന്‍ സത്യനാരായണന്‍ വിതുമ്പലോടെയാണ് രാഹുലിന് മുന്നില്‍ സങ്കടങ്ങളുടെ ഭാണ്ഡക്കെട്ടുകള്‍ അഴിച്ചത്. തന്റെ മകന്റെ ഘാതകരില്‍ ഒരാളെ പോലും ഒഴിയാതെ നിയമത്തിന് മുന്നില്‍ കൊണ്ടുവരണമെന്നാണ് ആ അച്ഛന് പറയാനുണ്ടായിരുന്നത്.