വാഹന 'ശവപ്പറമ്പുകള്ക്ക്' ശാപമോക്ഷമാവുന്നു: ജില്ലാ ഭരണകൂടം നടപടി തുടങ്ങി
കാസര്കോട് (www.evisionnews.co): നിയമ ലംഘനത്തിന് പിടികൂടിയ വാഹനങ്ങള് കൂട്ടിയിട്ട് ശവപറമ്പായി മാറിയ ജില്ലയിലെ വിവിധ സര്ക്കാര് ഓഫീസുകളുടെ മുറ്റവും പരിസരവും ജില്ലാ ഭരണകൂടം 'ക്ലീന്' ചെയ്യുന്നു. ഓഫീസ് ജീവനക്കാര്ക്കും പൊതുജനങ്ങള്ക്കും ബുദ്ധിമുട്ടുണ്ടാക്കുന്ന വാഹന 'ശവപ്പറമ്പുകള് ശ്രദ്ധയില്പ്പെട്ടതിനെ തുടര്ന്നാണ് ജില്ലാ കലക്ടര് ഡോ. ഡി. സജിത്ത് ബാബു നിയമ നടപടികള് പൂര്ത്തിയാക്കി വാഹനങ്ങള് അടിയന്തരമായി ലേലം ചെയ്യുന്നതിനുള്ള നടപടികള് സ്വീകരിക്കാന് നിര്ദേശം നല്കിയത്. ഇതിനായി പൊലീസ്, എക്സൈസ്, റവന്യൂ, ഫോറസ്റ്റ് വകുപ്പുകളുടെ യോഗം കലക്ടര് വിളിച്ചുചേര്ക്കുകയും ചെയ്തു. ഇതിന്റെ ഭാഗമായി ആദ്യഘട്ടത്തില് 257 വാഹനങ്ങള് ലേലം ചെയ്യുന്നതിനുള്ള നടപടികള് ആരംഭിച്ചു.
അനധികൃത മണല്ക്കടത്ത്, ലഹരി വസ്തുക്കളുടെ കടത്ത് തുടങ്ങിയ നിയമ ലംഘനങ്ങള്ക്ക് പിടികൂടിയ വാഹനങ്ങളാണ് പൊലീസ് സ്റ്റേഷന്, താലൂക്ക് ഓഫീസുകള് എന്നിവിടങ്ങളില് സൂക്ഷിച്ചിട്ടുള്ളത്. നിയമാനുസൃത പിഴ നല്കി വാഹനങ്ങള് രേഖകള് ഹാജരാക്കി ഉടമസ്ഥര്ക്ക് തിരിച്ചെടുക്കാമെങ്കിലും പലരും ഇങ്ങനെ ചെയ്യുന്നില്ല. അതുകൊണ്ടാണ് വാഹനങ്ങള് പലയിടങ്ങളിലും കൂട്ടിയിടേണ്ടി വരുന്നത്. തൊണ്ടിമുതല് അല്ലാത്ത വാഹനങ്ങളാണ് ആദ്യഘട്ടത്തില് ലേലം ചെയ്യുന്നത്. ഇവ ലേലം ചെയ്തതിന് ശേഷം ബാക്കി വരുന്ന വാഹനങ്ങളുടെ വിവരങ്ങള് ശേഖരിച്ച് അവയും നിയമാനുസൃതം ഒഴിവാക്കുന്നതിനുള്ള നടപടികള് സ്വീകരിക്കും. വാഹനങ്ങള് നീക്കം ചെയ്ത ശേഷം ഇവ സൂക്ഷിച്ച ഓഫീസ് പരിസരങ്ങള് സൗന്ദര്യവത്കരിക്കുന്നതിനുള്ള നടപടികള് സ്വീകരിക്കും. ജില്ലയിലാദ്യമായാണ് ഇത്രയും കൂടുതല് പിടിച്ചെടുത്ത വാഹനങ്ങള് പരസ്യലേലത്തിനായി വെക്കുന്നത്. ഉടമകള്ക്ക് അവസാന അവസരമെന്ന നിലയില് വാഹനങ്ങള് തിരിച്ചെടുക്കുന്നതിന് വിവിധ വകുപ്പ് അധികൃതരെ സമീപിക്കുന്നതിനായി 30ദിവസം കൂടി അനുവദിച്ചിട്ടുണ്ട്. 30 ദിവസങ്ങള്ക്കുള്ളില് രേഖകളുമായി ഹാജരാവാത്ത വാഹനങ്ങള് ഇനിയൊരു അറിയിപ്പില്ലാതെ ലേലം ചെയ്യും. വാഹനങ്ങള് സംബന്ധിച്ച വിവരങ്ങള് ജില്ലാ ഭരണകൂടത്തിന്റെ സമമെൃഴീറ.ഴീ്.ശി ല് ലഭ്യമാണ്. വാഹനലേലത്തിന്റെ ചുമതല കാഞ്ഞങ്ങാട് സബ് കളക്ടര് അരുണ് കെ. വിജയനും 9447100298, ഡി.വൈ.എസ്.പി (നാര്കോട്ടിക്സ്) നന്ദനന്പിള്ളക്കുമാണ് 9497990144. കോഡിനേഷന് ചുമതല കലക്റ്റേഴ്സ് ഇന്റേണ് പി. അര്ജ്ജുനനുമാണ്.
Powered by Info News For You
Comments
Post a Comment